পাখি মেলি উৰি যায়

একাবেকা বোঁৱতী সোঁতত
নৈ পৰীয়া সপোনে
বুকুলৈ কঢ়িয়াই লৈ আনে
মাটি আৰু জীৱনৰ
মধুভৰা গান

খলা-বমা পথাৰৰ মাজে মাজে
ওখোৰা মোখোৰা পথত
নদীবোৰেও লয়
সুকীয়া বাট

আন্ধাৰতো তিৰবিৰাই উঠে
অন্তৰৰো অন্তৰৰ পৰা
আনন্দ আৰু বিষাদেৰে ভৰা
মোৰ অৱস্থান

সেউজ হাবিৰ বুকুয়েদি বৈ অহা
প্ৰকৃতিৰ প্ৰতিটো শব্দত
উচপিচ বতাহৰ আলিংগন

বহুদিনৰ নিৰৱতাৰ পিচত
মনৰ ৰঙিয়াল চৰাইটো
পাখি মেলি উৰি যায়
শুকুলা মেঘৰ মাজে মাজে
ডেউকা কোবাই