মু্ক্ত বায়ুৰ সন্ধানত

বিশাল মন সমুদ্রত
ক্ষণিকৰ বাবে ফুটি উঠে
অন্য এখন ছবি

ইতিহাসৰ পাতবোৰ লুটিয়াই
টুকৰা টুকৰ হৈ পৰি থকা ভঙা দেৱালয়ৰ খণ্ডবোৰ
ধ্যানমগ্ন বুদ্ধৰ দৰে বুটলি ল'লো হাতত

বিচলিত মনত জিলিকি উঠিল
জীৱনৰ হেৰাই যোৱা কিছুমান পৃষ্ঠা

এক নিস্তব্ধতাৰ তৰঙ্গ বৈ গ'ল বুকত
এই উপস্থিতিৰ সন্ধিক্ষণত
মনৰ মাজত চলিল বিদ্ৰোহ

ৰুদ্ধ উশাহৰ সকাহ বিছাৰি
মন ঢাপলি মেলিলে
মু্ক্ত বায়ুৰ সন্ধানত