আজি কিয় ভাগিল ৰাগি

থমকি থমকি দেহৰ ৰন্ধ্ৰে ৰন্ধ্ৰে বয় যি ধাৰা
আজি কিয় হঠাতে লৈছে অবাৰিত গতি
তাৰ পৰশত উতনুৱা মনত মোৰ
বৈছে এজাক ধুমুহা
যাযাবৰী অঘৰি নাৱৰীয়া মই
কোবাল বতাহত, চাকনৈয়াত পৰি
পাক ঘূৰণি খাই কঁপিছে বুকু
ওন্দোলা আকাশৰ ক’লা মেঘ দেখি
মনত কিয় জানো বিৰহ জাগিছে
কিহৰ ৰাগিত আছিলো মই আপোনভোলা হৈ
আজি কিয় ভাগিল ৰাগি
নৈৰ ধলত পৰি হ’লো বলিয়া
মাটিৰ মোহত পৰি পাৰ বিছাৰি
ধুমুহা বতাহৰ মাজত খাইছো হাবাথুৰি