নিয়তিৰ হাতত মোৰ আকাংক্ষাৰ বীজ

বতাহত দোঁ খাই আছিল পকা  ঠোকবোৰ
ৰ'দত জিলিকি আছিল সোনালী ধানবোৰ
ধাননিৰ মাজত ৰিঙিয়াই থকা চৰাইৰ মাতত
মনটো নাচি আছিল ঘনে ঘনে
এটি নৈসৰ্গিক আনন্দবোধে
মনটো পুলকিত কৰি তুলিছিল

হঠাৎ দেখিলো মেঘ আৰু বিজুলীৰ দুৰ্বাৰ গতি
দুঃস্বপ্নৰ মায়াজাল ৰচিছে আকাশত
বুকুত ৰামধেনুলৈ গুজৰি আছে

ধাননিৰ চৰাইৰ জাক
আকাশত কিছু ধেমালি কৰি
হঠাৎ কৰবাত নোহোৱা হ'ল
পৰিত্যক্ত প্ৰেমিকাৰ দৰে
পৰি ৰ'ল সোনালী পথাৰ

মোৰ চকুত ভাহি উঠিল
স্বপ্ন ভঙাৰ প্ৰহেলিকা
সোনালী পাতত দেখিলো
অনন্ত নিৰৱতা

হাতেৰে গঢ়ি তোলা এখন সোনালী ছবি
হঠাৎ অহা ধুমহাই চিঙি ভাঙি নিঃশেষ কৰিব
চকুত জিলিকি উঠিল
নিয়তিৰ ৰহস্যময় খেলা

মোৰ শৰীৰত ফুটি উঠে কাতৰতা
আৰু বাঢ়ি যায় উশাহৰ গতি
মৃত্যুৰ সতে যেন চলিছে যোজ-বাগৰ

মোৰ নিশ্চিত ভবিষ্যত
গতি কৰিছে সংকতৰ মুখলৈ
গৰ্জি উঠে মন তথাপি নিৰুপায়
নিয়তিৰ হাতত মোৰ আকাংক্ষাৰ বীজ