সূৰুযৰ সোনোৱালী কিৰণে
লৈ আনিব কিজানি
প্ৰভাতৰ নতুন বতৰা
ৰৈ আছো সেই আশাৰে
দূৰ দিগন্তলৈ চাই
নিতাল নিস্তব্দ মৰু প্ৰান্তৰত
ৰৈ আছো অকলে
নাই গছ লতা নাই বননি
অকল বালিৰে ভৰা চাৰিও দিশ
নুশুনি পক্ষীৰ কল্লোলৰ ধ্বনি
নেদেখি উৰণীয়া চৰাইৰ জাক
নাই জাক জাক ৰঙীন পখিলীৰ
মন প্ৰাণ ভুলোৱা উৰণীয়া খেল
ধূলিৰ ধুমুহা আৰু তপত বালি
বাঢ়ি যায় তাপ দিন আগুৱালে
সহি আছো তুমি অহাৰ আশাৰে
দিগন্তলৈ চাই নিঠৰ হৈ
ৰৈ আছো সেই আশাৰে
সূৰুযৰ সোনোৱালী কিৰণে
লৈ আনিব কিজানি
প্ৰভাতৰ নতুন বাতৰি