বতাহৰ গাত ভেজা দি
তাই চিয়ঁৰিছে মনৰ আনন্দত
বীজবোৰ ফুটিছে পথাৰত
অতদিনে চন পৰি থকা মাটিডৰাত
প্ৰথমজাক বৰষুণ পাই
বীজবোৰ ফুটিছে কুঁহিপাত হৈ
বৰ যত্নেৰে নিজ হাতে
সৃষ্টি কৰা সপোনৰ পথাৰ
তাৰেই প্ৰতিফলনৰ প্ৰকাশ
এই সুকুমল কুঁহিপাত
পূৱাৰ চেঁচা বতাহজাকত
এধানমানি পাতবোৰে
কোমল ৰ’দজাক পাই
থুনুক থানাকৈ তুলিছে ঢৌ
ৰিমঝিম এটি আবেগে
ধুই নিলেহি দেহ মন
প্ৰথম প্ৰেমৰ মৰম সনা আবেশত
ওঠত বিৰিঙিল এটি হাঁহি