বুকুত জোৱাৰ তুলি
উজাই আহিছিল অস্থিৰতা
নিশাহত উত্তপ্ত বতাহ লৈ
বুকু কঁপিছিল বিভ্ৰান্তিত
কলা মেঘৰ ছাঁয়াত
দুখৰ উহ বিচাৰি
হৃদয়ত থকা মৌন সুঁতিটো
বৈ আহিব খুজিছিল
খিল খিল হাঁহিৰে
দূৰণিৰ পাহাৰটিলৈ চাই
বুকুত জাগিল চেতনা
জীৱনৰ ৰং এটি অনুৰাগ
একাবেকা হৈ বয় বুকুয়েদি
পাহাৰী নিজৰা হৈ
মনত জাগি উঠা
অনিশ্চয়তাৰ হাহাকাৰ মাথো
জীৱন সত্যৰ ৰশ্মিৰেখা
উগুল থুগুল অন্তৰত
নিঃশব্দে বিৰিঙি উঠিল
জোনাকৰ বিচিত্ৰ খেলা
আবেগত আবদ্ধ যন্ত্রনা আতৰি
হৃদয় বিয়পি বৈ গ'ল
জুৰিটিৰ অনুৰণিত ঝঙ্কাৰ