মেঘৰ আৰে আৰে ৰূপালী জোনাক সৰে
বিচাৰি পাওঁ মনৰ ৰঙীয়াল চৰাইটো
বুকুত ফুলা কেতেকীৰ সুৱাসত
মন ডেউকা কোবাই উৰে
সুৰৰ মূৰ্চ্ছনাত কঁপি উঠে বুকু
মনৰ হৰীণা জনী লৰা ধপৰা কৰে
মৃদু মলয়াৰ পৰশ পাই
আনমনা ভাৱ এটি উজাই আহে
জোনাকেও আকাশলৈ
হাত বাউল দি মাতে
বুকুত এসাগৰ জোৱাৰ তুলি
অস্থিৰতাৰ বতাহ বৈ যায় ঘনে ঘনে
ভাহি যায় সুৰভি আকাশে বতাহে
হৃদয়ত বাজি উঠে মধুমিঠা গান
বুকুৰ মৌকোঁহ নিগৰি সৰে
নিজৰাহেন একা বেকা সুঁতিৰে