দিহিং পাৰৰ নিৰ্জন বননিত
উবুৰিখাই পৰিছেহি গধূলীৰ চৰাইজাক
ফাগুনৰ উখল মাখল বতাহ জাকত
কপিঁছে কঁহুৱা হেন্দোলনি তুলি
আকাশত এখুজি দুখুজিকৈ থোপ খোৱা
ডাৱৰৰ টুকুৰাবোৰেও আহি আহি জিৰায়
জীৱন বান্ধৈ নৈপৰীয়া এই পৰিবেশত
হৃদয়েও প্ৰাণখুলি গীত জোৰে প্ৰেমৰ
বুকুখন গচকি নদীৰ পাৰে পাৰে
ডালে পাতে লাগি ৰয় হাবিয়াসবোৰ
বুকুৰ পূৰণি সপোনবোৰো নামি আহে
এখুজি দুখুজিকৈ জোনাক বিচাৰি