ৰিনি ৰিনি শুনা
ঢোল পেপাঁৰ মাতত
বহাগৰ প্ৰাণোচ্ছল আৱেদন
বৈ থকা সেমেকা বতাহজাকেও
গুনগুনাই আৱৰি লয় মন প্ৰাণ
অনুভূতিবোৰে প্ৰকাশৰ বাট বিচাৰি
খেপিয়াই ফুৰে দুৱাৰডলি
সাঁচি থোৱা হেঁপাহবোৰ
নতুনকৈ জাগি উঠে
নিঃশব্দ প্ৰতিশ্ৰুতিত
সন্ধিয়াৰ আৰে আৰে
প্ৰতিধ্বনিত সুৰবোৰ
হিয়াৰে বাগৰে ধল হৈ
ক্ষণবোৰৰ মিঠা আৱেশত
কুলিৰ সুৱদী মাতত
বুকুত ওফন্দি উঠে উলাহৰ ঢৌ
চৌদিশে ভাহি থকা
ঝংকাৰিত আৱেশে
সিঁচি যায় বুকুত বহাগৰ ৰং