আহিছো মেঘৰ আলয় শ্বিলঙলৈ
মনালিছা লিংডোৰ
ৰহস্যময় অস্তিত্বৰ সন্ধানত
আহিছো শ্বিলঙলৈ
ডাৱৰৰ মধুময় ৰূপৰ মাজত
সেমেকা শীতৰ সুগন্ধী বিছাৰি
চঞ্চল মনত আশাৰ ধল লৈ
বিছাৰি ফুৰিছো
সেউজী সপোন সনা গীতৰ সুৰ
ঠিকনা বিছাৰি
চিটিকি ফুৰিছো মই
মেঘেৰে আৱৰা পাহাৰ বগাই
শুভ্ৰ প্ৰপাতৰ ৰিণি ৰিণি শুনা
প্ৰতিধ্বনিত সুৰত
কাণ পাতি থিৰ হৈ ৰওঁ
সজীৱ শুভ্রতাৰ বুকুত
বিছাৰি নেপালো কতেনো হেৰাল
সুৰত চঞ্চল যৌৱনৰ গুণ গুণ
সিক্ত কন্ঠৰ কোমলতা বিছাৰি
হাবাথুৰি খালো পাহাৰে পাহাৰে
হৃদয়ে উচুপী উঠিছিল নিৰৱে